Mga Buhay Na Puno ng Drama

Haha, paumanhin sa mga magbabasang nasosobrahan sa dami ng sinusulat kong mga ka-dramahan. Layunin ko noong una maging komediya ang mga kwento ng Ang Siyam, na may paunti-unting drama sa bandang huli. Kaso hindi ito simple para sa akin dahil hinahanap ko ang mga sagot sa mga tanong tulad ng:

ang Ang SIyam lamang ba at ilan pang mga katauhan ang may katangi-tanging kapangyarihan?

May natirang mandirigma sa dapat na huling paghaharap noong may mahigit sisentang taon na. Paano ito nangyari? Ano ang dahilan kung bakit walang dapat matirang buhay?

Sino ba talaga si Ginoong Snow? Si Impeng Negro?
(more…)

Sikretong Samahan

Binuo ko ang samahang ito dala ng pangangailangan. Alay ko sa mga taong kumupkop sa akin ang pagpapanatili ng kapayapaan. Lagi ko silang isinasaisip, lalo na kapag nangangailangan ako ng inspirasyon.

Walang dudang mabuti akong tao kung titignan gamit ang mata ng inosente. Mga mangmang lang ang dapat gumawa ng ganoon. Natutunan ko ang isa sa pinakamahalagang pangaral ng kasysayan: alamin ang nakaraan upang hindi ito maulit at maulit nang maulit. Isinasaloob ko ang mga salitang iyon.
(more…)

Mga Interbyu- Janoy Mitas

PinoyHeroes.com: Narito kami ngayon kasama ang direktor ng palapit na sure mega blockbuster hit: Ang Siyam na Mandirigma, si Janoy Mitas.

PH: Ano ang naging reaksyon mo nang personal kang lapitan ng mga manunulat ng sikat na seryeng Ang Siyam?

Janoy Mitas: Noong una, hindi ko malaman kung nagkalokohan na. Wiling-wili talaga ako habang binabasa ang mga kwento nila bago pa maging ganito ang pagkasikat ng AS [Ang Siyam]. Hiniling ko nga na sana magkaroon ako ng pagkakataon maging bahagi ng anumang proyektong may kinalaman sa mga tauhang tulad nina Mark at Carlo [ng Ang Siyam].

PH: Kilala ka bilang “ang direktor na mapuso” dahil halata sa iyong nakaraang mga proyekto ang pagsasapuso sa mga orihinal na konsepto ng mga kwento, nobela at komiks. Ano ang masasabi mong maaasahan ng fans ng Ang Siyam sa pelikulang parating?

JM: Asahan nilang hindi ako mapapalihis sa paglahad ng kanya-kanyang mga kahinaan sa pakikipaglaban. Iyon ang naging pinakamalaking isyu sa akin noong binabasa ko ang mga kwento. Marami pang aksyon ang maisasama sa mga paghaharap at pakikipaglaban.

PH: Hanggang ngayon, hindi pa rin sigurado kung sino talaga ang magiging kontrabida ng Ang Siyam na Mandirigma. Ano ang opinyon mo tungkol dito?

JM: Mahusay na itinago ng lahat ng may-alam ang tungkol sa kontrabida. Hindi ko pa pwedeng sabihin, pero ipapaalam ko lang na hindi kabigla-bigla kung sino man iyon, ngunit mapipilitan ang manonood pag-isipan kung bakit nagkaganoon.

PH: Masyado mo naman kaming pinaglalaruan. Hulaan na lang muna hangga’t maikalat ang tungkol doon.

PH: May pag-asa bang magkaroon ng karugtong ang pangkasalukuyang pelikula?

JM: (Napatawa) Tignan natin. Hindi ako maaaring tumanggi kung mapagpasyahan nilang gamitin ako ulit.

PH: Huling tanong: Sino ang pinakagwapong miyembro ng Ang Siyam?

JM: (Napatawa) Si Ted dapat, pero sa aking opinyon, si Daniel. Doble ang appeal ni Daniel sa mga Tsiks niya: gwapo na, mayaman pa. PH

Si Panide Salvador

Ang susunod ay preview mula sa parating na bagong likhang kwento mula sa mga manunulat ng Ang Siyam: Ang Huling Pagkikita

Si Panide Salvador

“Halina kayo’t sumunod sa akin,” aya ni Panide sa siyam na magkakasama. Nagpatuloy siya sa kanyang paghakbang,  “Mararating natin ang Landas ng Ligaw na Bungo sa loob nang ilang sandali—“ mabilis na umiwas si Panide sa pabagsak na kalansay. Kumalansing ang mga buto nito sa dilaw na kalsadang tinatahak. “Na naman! Nagugutom na naman ako!” sigaw ni Panide habang kinakapa ang dala-dalang sako. Naging hudyat na ito sa siyam na mandirigma na mapapasubo sila sa isa pang di-kanais-nais na engkwentro.

Umangat ang kalansay na bumagsak malapit kay Panide. Nagsimula itong magsalita, “Bakit ka napadapad dito, Panide Salvador? Ano ang karagdagang kahalangan ng pagdala mo ng iba pang mga balat-anyo?” Mabilis na nagbukas-sara ang naninilaw panga ng kalansay. Tumunog ang kulang-kulang nitong mga ngipin. Mula sa malayo, mala-bundok na alon ng sari-saring buto ang rumagasa. Napaatras si Panide. Humakbang patalikod ang siyam. Tumigil ang alon malapit sa pinagtatayuan ng buong kalansay. “Ako si Hakalan—Kal  for short—narito kayo ngayon para harapin ang puwersa ng Ligaw na Bungo!” Sabay-sabay na nagbuu-buo ang sari-saring mga butong nagpatung-patong. Kung anu-anong anyo ang nabuo mula sa mga ito: mga mukhang hayop na may apat na paa, mala-taong  walang ulo, at iba pang mga hugis na hindi maintindihan.

Napakagat si Panide sa hawak-hawak na tinapay. Kumapa siya ng isa pang piraso mula sa sako gamit ang kabilang kamay. "Huwag niyo sana akong masyadong gutumin!" Sumugod ang mga kampon ni Hakalan. Parang kidlat ang sunud-sunod na tadyak ni Panide. Nasama na rin sa labanan ang siyam na mandirigma…